Surabaya, 23/12/2025

Konsellu Administrasaun APORTIL I.P. ofisialmente informa ba públiku katak ita-nia Ró-ahi Berlin Ramelau to'o ona iha Estaleiru PT PAL, Surabaya-Indonézia hodi halo manutensaun rutina.

Atividade ida-ne’e hanesan parte ida husi ajenda manutensaun rutina hodi garante ró ne’e seguru nafatin, bele navegável no kumpre padraun operasionál nasionál no internasionál liuhusi regulamentu seguransa internasionál ne’ebé estabelese ona iha IMO (International Organization Maritime) no (SOLAS) Safety of Life at Sea.

Manutensaun rutina ne'e ho objetivu atu hala'o inspesaun klean ba kondisaun téknika ró nian:

Teste ba motór no sistema elétriku sira,
Inspesaun ba ekipamentu seguransa nian (Jakét salva-vida, kolete salva-vida, ferramenta hamate ahi, nst.
Verifikasaun ba sistema navegasaun no komunikasaun,
Inklui Reparasaun hirak-ne’ebé nesesita hodi halo manutensaun

Prosesu manutensaun rutina ida-ne’e konsidera hanesan aspétu krusiál hodi asegura katak embarkasaun ne’e hela iha kondisaun navegável no prontu atu halo transportasaun pasajeiru no karga sira, tuir padraun seguransa internasionál ne’ebé a’as liu.

Tuir Konsellu Administrativu APORTIL I.P., atividade manutensaun rutina ne’e obrigasaun legál husi institusaun, bazeia ba padraun internasionál ne’ebé defini iha regulamentu SOLAS (Safety of Life at Sea) no padraun IMO (International Maritime Organization). Regulamentu refere ezije atu ró pasajeiru sira hala’o inspesaun periódika pelomenus tinan ida dala ida, hodi garante seguransa navegasaun no protesaun ambientál iha área marítima.

Durante períodu manutensaun, operasaun Ró Berlin Ramelau nian sei suspende temporariamente. Konsellu Administrasaun APORTIL I.P. arranju alternativu sira hodi minimiza interupsaun ba servisu transporte marítimu Dili-RAEOA no RAEOA-Dili, maka ofisialmente Ró Berlin Nakroma subtitui fila fali hodi halo movimentsaun Dili-RAEOA no RAEOA-Dili.

Bele klik iha link ne’e. https://www.facebook.com/photo?fbid=855926953841237&set=a.138827478884525 hodi haree informasaun klaru kona-ba mudansa oráriu provizoriamente iha fulan dezembru to’o inisíu fulan janeiru tinan 2026.

Atividade manutensaun rutina ba Ró Berlin Ramelau nian sei halo tuir previzaun ténika, ne'ebé hatudu katak prosesu manutensaun sei hala’o durante loron 60. Tempo ne'e bele muda bazeia ba progresu servisu iha terenu. Hafoin manutensaun remata no inspesaun teknika konklui, Ró Berlin Ramelau sei kontinua ho operasaun normál hodi sustenta mobilidade no konetividade entre Dili-RAEOA no RAEOA-DIli.

Ho manutensaun rutina ne’e, Konsellu Administrasaun APORTIL I.P. kontinua afirma ninia kompromisu atu fornese servisu ró nian ne'ebé seguru, efisiente, no tuir padraun globál.

Mídia APORTIL I.P

NOTÍSIA