TIBAR, 27/03/2026

Prezidente Konsellu Administrasaun APORTIL, I.P., Sr. José de Oliveira Leong, akompaña husi Diretór Nasionál Transportes Marítimos (DNTM), Sr. Helder P. M. da Silva, inklui reprezentante Diretór CNEFP-Tibar, ofisialmente ensera formasaun Basic Safety Training (BST) iha Sentru Formasaun CNEFP-Tibar no simbólikamente entrega sertifkadu ba formandu/a sira. Formasaun ne’e partisipa husi estudante mariñeiru na’in sia husi Universidade Hang Tuah Surabaya, Indonézia, ne’ebé kompostu husi estudante bolseiru na’in haat no estudante ho kustu privadu na’in lima.

Objetivu prinsipál ida husi Formasaun ba estudante marineiru sira kona-ba Seguransa Báziku (BST) maka atu kompleta rekizitu sira ba Livru Mariñeiru no sertifikadu kompeténsia mínimu atu nune'e bele serbisu iha ró laran.

La ho sertifikadu BST, estudante ka mariñeiru potensiál ida la hetan lisensa legál atu sa'e ró, tantu ba objetivu sira prátika serbisu nian ka atu serbisu ho profisionál, tanba ida-ne'e maka padraun seguransa internasionál báziku ne'ebé regula iha STCW (Standards of Training, Certification, and Watchkeeping)

Iha intervensaun Prezidente Aportil I.P. apela ba estudante sira atu foka ba sira-nia estudu, tanba futuru APORTIL I.P, DNTM no marineiru mak imi estudante sira, ami nia tempu agora ne’e prepara imi ba oin, tanba ne’e estuda no aproveita tempu ho didi’ak, labele halo diskriminasaun entre estudante bolseiru no estudante ho kustu privadu tanba ita mesak timor-oan de’it. Ba estudante ne’ebé mak ba ho kustu privadu, Aportil I.P sei kontinua halo esforsu koordena ho FDCH atu bele kobre metade 50% husi kusta formasaun ba estudante ho kustu privadu sira.

Tinan oin sei esforsu bolseiru ba marineiru nian sei kontinua aumenta atu nune’e rekursu umanu iha seitór marítima bele aumenta, hateten prezidente Aportil I.P. ba formandu marineiru sira.

Iha sorin seluk, reprezentante CNEFP-Tibar hateten ba formandu sira hotu katak, buat hirak ne’ebe’ imi aprende deseju formandu sira bele uza ida-ne’e hodi salva imi nia vida no prinsipalmente ema seluk nia vida iha ró laran no prepara imi atu sai kadete ida-ne’ebé mak kualifikadu no pronto atu halo Pratika ka servisu iha ró laran.

Aliende ne’e, Diretór DNTM deseju ba estudante sira, ho formasaun ida-ne’e bele forma estudnate sira bele sai kadete ida-ne’ebé mak di’ak atu asegura no fó prioridade ba moris pasajeirus nian iha Ró-Laran, tanba sai ona meineiru imi tenke hatudu imi nia profisionalismu iha ro laran no simu responsabilidade ida-ne’ebé hanesan kadete bainhira ita serbisu iha ro laran.

Mídia, APORTIL I.P