KUPANG, 01 SETEMBRU 2026 

Prezidente Konsellu Administração dos Portos de Timor-Leste - Aportil, I.P Sr. José de Oliveira Leong, ofisialmente halo abertura ba treinamentu intensivu Jestaun Portuária no ISPS Code, dala ida asina Nota de Entendimentu (MoU) ho Manager Marketing Focus Tecno Media Development, Sra. Artesty Hayuni Parameswari, iha Kupang, Indonézia.

Formasaun ne'ebe sei hala'o durante loron hat (4) ne'e, fahe ba klase rua, deziñadu loloos ba klase Treinamentu Jestaun Portuária no klase Kódigu ISPS nian. Programa ne'e konta ho partisipasaun husi delegasaun APORTIL, I.P hamutuk na'in 17 ne'ebe sei tuir formasaun ne'e ho kbi’it tomak hodi absorve matéria sira.

Iha ninia diskursu abertura, Prezidente APORTIL, I.P hateten katak programa edukasionál ne'e sai hanesan pasu estratéjiku ida ba instituisaun laran.

Treinamentu ne'e fó koñesimentu kle'an kona-ba jestaun operasionál portuáriu no padraun seguransa internasionál ba ró ahi no instalasaun portu sira, hodi nune'e bele eleva kualidade no kapasidade rekursu umanus Timoroan nian.

Aleinde abertura treinamentu iha mós asinatura MoU ne'ebé sai hanesan marka istórika hodi hametin kooperasaun servisu entre parte rua ba períodu tinan ida nian, hodi garante kontinuidade ba dezenvolvimentu rekursu umanu. 

Iha fatin hanesan, Sra. Artesty Hayuni Parameswari hato'o agradesimentu boot ba konfiansa ne'ebé APORTIL, I.P fó ona ba sira hodi prepara apoiu fasilita treinamentu refere.

Objetivu husi abertura treinamentu ne’e hodi kapasita rekursu umanu APORTIL I.P nian iha jestaun portuáriu, Kódigu ISPS no asina MoU.

Serimónia importante ne'e hetan partisipasaun másimu husi ekípa APORTIL, I.P nian, ne'ebé kompostu husi Diretór Operasionál, Sr. Marcelino dos Santos, XefeDepartementu Portu Iwao Kitahara Mahata RAEOA, Sr. Ricardo Maia Moniz, Diretór Rekursu Umanu, Sr. Diamantino da C. L. Soares ho ekipa Aportil, I.P inklui Ekipa fasilitadór husi Focus Tecno Media Development

Média, APORTIL I.P