Surabaya, 1 Abril 2026 

APORTIL I.P, liuhosi nia Prezidente Sr. José de Oliveira Leong, hamutuk ho Vogál I Sr. Julio Saldanha Barreto inklui delegasaun téknika ne’ebé kompostu husi, Diretór Kabutajen Nasionál Rolando Xavier, Diretora Administrasaun no Finansas Francisca Dionia de Sousa Brites, no Xefe Departamentu Armada Téknika Augusto da Costa dos Santos, partisipa iha atividade sea trial ba MV Berlin Ramelau iha Surabaya, Indonézia.

Delegasaun ne’e mos akompaña husi Kapitaun Portu Rogerio Soares husi Autoridade Nasionál Transporte Marítima, hanesan parte husi esforsu atu asegura katak náviu refere bele hala’o operasaun ho seguransa no efisiénsia aas bainhira fila ba Timor-Leste.

Sea trial ne’e realiza hafoin MV Berlin Ramelau liuhosi prosesu manutensaun rútina no inspeksaun téknika husi Biro Klasifikasi Indonesia (BKI), nu’udar entidade klasifikasaun ne’ebé responsável atu avalia kondisaun téknika no seguransa náviu. Objetivu prinsipál husi teste ka Sea Trial ne’e mak atu verifika funsionamentu jerál sistema sira, inklui mekanizmu mákina, eletrónika no integridade estrutura náviu nian.

Loke mós link ida-ne’e https://aportilip.gov.tl/tl/publication/news/44 hodi asesu informasaun kona-ba Ró-ahi Berlin Ramelau Atraka iha Estaleiru.

Tuir rezultadu inspeksaun ne’ebé realiza, BKI konfirma katak manutensaun ne’ebé halo ba MV Berlin Ramelau kumpre ona padraun klasifikasaun ne’ebé vigora. Inspeksaun ne’e mos garante katak estrutura no sistema náviu iha kondisaun di’ak, nune’e fó aprovasaun ofisiál atu náviu bele fila fali ba hodi halo operasaun normál.

Atividade sea trial ne’e involve mós partisipasaun husi instituisaun oioin, inklui Direção Nacional de Transporte Marítimo, Palmars, Biro Klasifikasi Indonesia, estudante bolseiru Timor-Leste, no dosente sira husi Universidade Hang Tuah iha Surabaya.

Ho konkluzaun husi prosesu ida-ne’e, MV Berlin Ramelau konsidera prontu atu fila ba Timor-Leste hodi kontinua fó servisu transporte marítimu ba komunidade, ho garantia katak náviu hala’o tuir padraun seguransa no operasaun internasionál.

Mídia APORTIL I.P