Díli, 5 Marsu 2026

Prezidente Konsellu  Administração dos Portos de Timor-Leste, APORTIL, I.P., José de Oliveira Leong, hamutuk ho Vogal II, Leandro de Sena, hala’o sorumutu koordenasaun ho Prezidente Komisaun Funsaun Públiku (KFP), Agostinho Letêncio de Deus, hodi ko’alia kona-ba implementasaun rejime espesiál no rejime jerál iha administrasaun públika.

Sorumutu koordenasaun ida-ne’e realiza ho objetivu atu fortalece koordenasaun entre instituisaun rua ne’e relasiona ho preparasaun implementasaun rejime espesiál no rejime jerál iha setór funsaun públika.

Iha diskusaun ne’e, parte sira ko’alia liu-liu kona-ba aspetu tékniku sira relasiona ho mekanizmu implementasaun rejime sira ne’e, atu asegura katak prosesu implementasaun bele lao tuir orientasaun no regulamentu governu nian.

Diskusaun mos foka ba aplikasaun tabela salariál ba funsionáriu públiku, ne’ebé mak sai hanesan parte importante iha prosesu implementasaun rejime espesiál no rejime jerál.

Iha sorumutu refere, ko’alia mós kona-ba preparasaun téknika no prosedimentu administrativu sira ne’ebé presiza atu implementa sistema salariál ne’e ho di’ak no efisiente.

Tabela salariál refere hahú implementa fila fali iha fulan Marsu tinan 2026, tuir polítika governu nian iha área reforma administrasaun públika, atu garante sistema remunerasaun ne’ebé mais klaru, transparente no responde ba nesesidade funsaun públika.

Média, APORTIL I.P