Surabaya, 01 Abril 2026

Autoridade Portuária Timor-Leste, I.P. (APORTIL), liuhusi nia Prezidente do Conselho de Administração, José de Oliveira Leong, hamutuk Vogál I Sr. Julio Saldanha Barreto ho ekipa tékniku administrative sira, hala’o sorumutu estratéjiku ho kompania Palmars iha Surabaya, Indonézia, hafoin remata ho susesu prosesu sea trial ba náviu MV Ró Berlin Ramelau.

Objetivu prinsipál husi sorumutu refere mak atu realiza avaliasaun komprensivu ba rezultadu finál husi prosesu sea trial ba náviu MV Berlin Ramelau, ho ênfaze espesífiku ba análize tékniku sira-ne’ebé relasiona ho kondisaun operasionál no manutensaun náviu. Avaliasaun ida-ne’e inklui verifikasaun detallu ba funsionamentu mákina prinsipál, sistema elétrika, no mós ekipamentu suporta sira seluk, hodi asegura katak hotu-hotu opera tuir padraun seguransa no efisiénsia ne’ebé estabelese ona.

Aleinde ne’e, parte rua kontinua diskute mós kona-ba implementasaun manutensaun rutina ne’ebé realiza iha PT. PAL Indonesia, ho objetivu atu asegura katak servisu hotu-hotu remata tuir padraun internasionál no espesifikasaun tékniku ne’ebé determina ona.

Iha sorumutu ne’e, parte sira mós aborda asuntu sertifikasaun náviu, liuhusi Biro Klasifikasi Indonesia (BKI), atu kompleta rekezitu legál no tékniku sira antes náviu ne’e hala’o viajen husi Indonézia ba Timor-Leste.

Sorumutu ida-ne’e hatudu kolaborasaun metin entre Aportil, I.P., DNTM, no Palmars, iha esforsu hamutuk atu garante seguransa, efisiénsia no prontidaun operasional ba MV. Berlin Ramelau.

Ho realizasaun sorumutu tékniku ida ne’e, Aportil, I.P. reafirma komitmentu atu asegura katak náviu MV. Berlin Ramelau prontu atu hala’o operasaun marítima ho padraun aas, liuhusi prosesu verifikasaun rigorozu no koordinasaun institusionál ne’ebé di’ak.

Sorumutu ne’e partisipa husi Diretór Kabotajen Nasionál, Rolando Xavier; Diretora Finansas, Francisca Dionia de Sousa Brites; Xefe Departamentu Armada Téknika, Augusto da Costa dos Santos; no Kapitaun Portu, Rogerio Soares, husi Diresaun Nasionál Transporte Marítima (DNTM).

MÍdia APORTIL I.P