DILI, 15/01/2026

Konsellu Administração dos Portos de Timor-Leste - Aportil, I.P, liuhusi Vogál I, Sr. Julio Saldanha Berreto, hamutuk ho Vogál II, Sr. Leandro de Sena no akompaña husi ekipa tékniku hala’o sorumutu koordenasaun ho parseiru estratéjiku sira, ne’ebé kompostu husi Diresaun Nasionál Transporte Marítima (DNTM) no operadór ró privadu Success Kompanhia JAJ OCEANS UNIP., LDA.

Objetivu prinsipál husi sorumutu ne’e atu hametin kooperasaun institusionál hodi garante servisu transporte marítima ne’ebé efisiente, seguru no sustenável ba pasajeirus sira.

Sorumutu ne’e foka liu ba planeamentu no monitorizasaun servisu ne’ebé tenke tuir regras Shift Standard Stability and Safety no padraun husi International Maritime Organization (IMO). Parte DNTM mós fó atensaun ba operadór sira atu Prepara ekipamentu no fasilidade saúde iha ró laran no kumpri rekerimentu sira ne’ebé sei fó sai liuhusi sirkulár tuir padraun internasionál.

Vogál I APORTIL, Sr. Julio Saldanha Berreto, fó énfaze katak seguransa la depende de’it ba ekipamentu, maibé mós ba disiplina pasajeiru sira nian. Nia husu ba pasajeiru sira atu kumpri regulamentu, liuliu kona-ba limitasaun tikete hodi evita ultrapasa kapasidade másimu ró nian. Ida-ne’e importante tebes atu garante katak ekipamentu salva-vida, hanesan life jackets, sufisiente ba ema hotu ne’ebé iha ró laran.

Iha biban ne’e, APORTIL, I.P. husu ba DNTM atu foti medida rigorozu no labele tolera kualkér falhansu ne’ebé bele hamenus seguransa pasajeiru sira nian. APORTIL insiste katak tenke iha intervensaun direta bainhira presiza, hodi nune’e vida pasajeiru sira nian sai duni prioridade dahuluk iha operasaun transporte marítima hotu iha Timor-Leste.

Medida sira-ne’e tenke implementa tuir padraun internasionál ne’ebé vigora, hodi garante operasaun transporte marítima ne’ebé seguru, fiável no responsábel.

Média, APORTIL I.P