CNEFP-Tibar, 16 Marsu 2026

Vogál I APORTIL, I.P Sr. Julio Saldanha Barreto,  hamutuk ho FDCH, reprezentante SEFOPE inklui Diretór CNEFP-Tibar ofisialmente lansa treinamentu Basic Safety Training (BST) ba estudante timor-oan na'in 9 kompostu husi estudante timor-oan feto na'in 2 husi Maritime Academy, Surabaya, Indonézia no funsionáriu APORTIL na'in 16  iha Centru Formasaun CNEFP-Tibar.

Iha intervensaun Vogál I APORTIL, Sr. Julio Saldanha Barreto, emfatiza katak formasaun ne’e hanesan investimentu estratéjiku ba nasaun. "Osan ita iha, tansá ita la investe ba ita-nia ema? Se ita lakoi investe agora, ita sei nafatin halerik ba ema seluk nia kbiit iha futuru," dehan Sr. Julio hodi motiva formandu sira hodi aproveita oportunidade ne'e ho disiplina aas.

Konsellu SEFOPE, Sr. Ilidio Ximenes da Costa, subliña katak maske Timor-Leste iha pozisaun estratéjiku ho rikusoin tasi ne'ebé boot, dezafiu prinsipál mak menus rekursu umanus. Nia subliña katak dependénsia ba ema estranjeiru no kazu illegál fishing bele rezolve de'it se Timor-Leste foku investe iha nia sidadaun rasik hodi maneja rikusoin tasi nian ho kbiit rasik.

Inspetór Sentru Formasaun Marítima, Sr. Joanico Marcelo de Jesus, esplika katak BST ne’e kriteiru obrigatóriu ba formandu náutika no téknika sira antes hakat ba prátika iha ró laran. Durante semana rua, formandu sira sei hetan formasaun báziku ha'at: Elementary First Aid (Primeiru Sokoru), Personal Safety & Social Responsibility (Seguransa Pesoál), Fire Prevention & Fire Fighting (Kombate Ahi), no Personal Survival at Sea (Sobrevivénsia iha Tasi).

Partisipa iha Sermónia Abertura Vogal I KA APORTIL, I.P, Sr. Julio Saldanha Barreto, hamutuk ho Vogál II Sr. Leandro de Sena, akompaña husi Diretór Rekursu Humanu Sr. Diamentino da Costa Lobo Soares, Konsellu SEFOPE, Sr. Ilidio Ximenes da Costa inklui Sr. Joanico Marcelo de Jesus nu’udar Inspetór Centru Formasaun CNEFP-TIBAR.

Kooperasaun ne'e sai hanesan pasu importante ida hodi prepara rekursu humanus nu'udar xave ba futuru marítimu Timor-Leste nian.

Média, APORTIL I.P